АҚШда барча рейслар тўхтатилгани ортидан поезд чипталарини брон қилиш тизими ҳам ишдан чиқди
АҚШда авиақатновлар вақтинча тўхтатилгани сабабли темирйўл чипталарини брон қилиш ва сотиш тизимида ҳам носозлик кузатилди. Оқибатда минглаб йўловчилар муқобил сафар вариантларини топишда қийинчиликка дуч келди.
Tasnim News хабарига кўра, жума куни кечқурун мамлакатнинг темирйўл ташувчиси Amtrak компанияси сайти ва мобил иловасида узилишлар юз берган. Юзлаб фойдаланувчилар чипталарни брон қилиш имкони бўлмаётгани ҳақида хабар берган.
Fox 5 телеканали маълумотларига кўра, компания тизимдаги муаммоларни сафарларга талаб кескин ошгани ва бутун тизим бўйлаб янгиланиш жараёни билан изоҳлаган.
Соат 21:00 атрофида Amtrak брон қилиш тизимлари босқичма-босқич тикланаётганини маълум қилган. Бироқ айрим йўловчилар тўловларни амалга ошириш, сафарни брон қилиш ва чипталарни алмаштиришда ҳали ҳам қийинчиликларга дуч келиши мумкинлиги айтилган. Шунингдек, қўллаб-қувватлаш хизматига қўнғироқлар сони ва жавоб кутиш вақти ҳам ошган.
Темирйўл тизимидаги узилиш АҚШ Федерал авиация маъмурияти (FAA) алоқа тизимидаги вақтинчалик носозлик сабабли мамлакат бўйлаб барча авиақатновларни тўхтатиш ҳақида қарор қабул қилганидан кейин содир бўлди. Кейинчалик ушбу чеклов бекор қилинган.
Авиадиспетчерлар алоқасининг узилиши ва парвозларни тўхтатиш ҳақидаги буйруқ АҚШ авиация соҳасида жиддий узилишларга олиб келган.
АҚШ президенти Дональд Трамп Fox News телеканалига берган интервьюсида авиация тизимидаги сўнгги носозликка сунъий интеллект ёки киберҳужумлар алоқадор бўлгани эҳтимолини рад этган.
