Мбаппе “Реал” учун тиббий кўрикдан ўтди
Ҳужумчи Килиан Мбаппе 2024 йилги Европа чемпионати якунланганидан сўнг “Реал Мадрид”да тиббий кўрикдан ўтгани ҳақида Relevo нашри хабар тарқатди.
25 ёшли ҳужумчининг “Қироллик клуби” футболчиси сифатидаги расмий тақдимоти бугун, 16 июль куни бўлиб ўтиши аввал хабар қилинганди.
Тадбир “Лос Бланкос”нинг уй аренаси ҳисобланган “Сантьяго Бернабеу” стадионида бўлиб ўтади.
Мбаппенинг Мадрид грандига ўтиши ўтган ой бошида эълон қилинган эди. Франциялик ҳужумчи “Реал” билан 5 йилга узоқ муддатли шартнома имзолади. Килиан “Лос-Бланкос” сафига “ПСЖ”дан кўчиб ўтди.
