Тошкентда лифт ичида одамлар билан тушиб кетди

Воқеа жойига лифтга хизмат кўрсатувчи ташкилот вакиллари етиб келиб, аҳолини 4-5 дақиқа ичида чиқариб олишга муваффақ бўлган.

Куни кеча ижтимоий тармоқлар орқали Яшнобод тумани Нурмуҳаммедов даҳаси 12-уй лифтининг узилиб тушиб кетгани ҳақида видеотасвир тарқалди.

Қурилиш ва уй-жой коммунал хўжалиги вазирлиги ахборот хизматининг хабар беришича, лифтнинг тўхташ қаватига келганда секинлаштириш функциясини амалга оширувчи датчик носозлиги туфайли ўз вақтида керакли сигнал етиб бормаган. Шу боис лифтнинг ҳимоя функцияси ишлаб, 2- ва 3-қаватлар оралиғида ҳаракатланишдан тўхтаган.

Кўп қаватли уйга хизмат кўрсатувчи «Экоҳудуд» ва лифтларнинг эксплуатациясини шартнома асосида амалга ошириб келаётган «Хавфсиз лифт» ташкилотининг 24/7 диспетчерлик хизматига келиб тушган мурожаат тезкорлик билан бартараф этилган. Воқеа жойига лифтга хизмат кўрсатувчи ташкилот вакиллари етиб келиб, аҳолини 4-5 дақиқа ичида чиқариб олишга муваффақ бўлган.

Ҳозирда лифт қурилмаси соз ҳолатга келтирилган.