Германия Президенти Франк-Вальтер Штайнмайер бўлиб ўтган янги Бундестагнинг биринчи мажлисида канцлер Олаф Шольц бошчилигидаги ҳукуматни расман истеъфога чиқарди. Бу ҳақда “Дунё” АА хабар бермоқда.
Deutsche Welle телеканалининг маълумотига кўра, Президент Штайнмайер канцлер ва ҳукуматнинг 14 нафар вазирига истеъфо ҳақидаги расмий ҳужжатларни топширган.
Маросим Берлин марказидаги Бельвю саройида бўлиб ўтди. Президент ўз нутқида Шольц ва унинг жамоасига миннатдорлик билдириб, уларнинг фаолиятини юқори баҳолаган.
Шу билан бирга, Штайнмайер канцлер ва вазирларга янги ҳукумат шакллангунча вақтинчалик вазифаларини бажариб туришни сўраган. Қонунчиликка кўра, бундай тартиб Бундестаг янги ҳукуматни тасдиқлаганга қадар амал қилади.
Эслатиб ўтамиз, февраль ойи охирида Германияда муддатидан аввал парламент сайловлари ўтказилган эди. Унда Фридрих Мерц раҳбарлигидаги Христиан-демократик ва Христиан-социал иттифоқи (CDU/CSU) консерватив блоки ғалаба қозонди. Янги ҳукумат таркиби шу кунларда шакллантирилиши кутилмоқда.
Дўстларингизга ҳам юборинг:
