Вашингтонда ҳақиқий саросима: Трампнинг бу қадар қаттиқ ҳаяжонланишига тарихий қўрқув сабаб бўлган
Америка Қўшма Штатларининг президенти Дональд Трамп Эрон осмонида АҚШнинг F-15E қирувчи самолёти уриб туширилгани ва икки нафар учувчи бедарак йўқолгани ҳақидаги хабарни ўта оғир қабул қилган. The Wall Street Journal нашрининг Оқ уйдаги манбаларига таяниб ёзишича, бу воқеа Вашингтонда ҳақиқий саросима ва ғазаб тўлқинини келтириб чиқарган.
Манбаларнинг сўзларига кўра, Трамп Оқ уйнинг Ғарбий қанотида бир неча соат давомида ўз ёрдамчиларига бақириб, ғазабини сочган. У тинмай: «Европаликлар ёрдам бермаяпти!» – деб такрорлаган. Ўша вақтда президент маъмурияти аъзолари Трампнинг беқарор ва тажовузкор кайфиятидан чўчиб, унга фақат энг муҳим тезкор маълумотларни бериш билан кифояланишган.
Нашрнинг қайд этишича, Трампнинг бу қадар қаттиқ ҳаяжонланишига тарихий қўрқув сабаб бўлган. Ўша пайтда у билан мулоқотда бўлган инсонларнинг айтишича, президентнинг кўз олдида 1979 йилги Эрон инқирози (АҚШ элчихонаси ходимларининг гаровга олиниши) гавдаланган.
Маълумот учун: 1979 йилда Эронда 66 нафар америкалик дипломат гаровга олинган ва бу АҚШ ташқи сиёсатидаги энг йирик муваффақиятсизликлардан бири сифатида тарихга кирган эди.
