Босқинчлик, тортиб олиш ортидан топилган бойлик қачондан бери шараф бўлиб қолди!..
АҚШ президенти Дональд Трамп ХХР раиси Си Цзиньпин билан музокаралар ўтказиш учун Хитойга қилган уч кунлик давлат ташрифи якунлари бўйича Американинг «Fox News» телеканалига интервью берди. Сиёсатчининг энг муҳим баёнотлари — қуйидаги материалда.
ХХР билан муносабатлар
Трампнинг сўзларига кўра, Хитой савдо божларидан қочиш учун ўз корхоналарини Қўшма Штатлар ҳудудида қуриши керак. У Хитой корхоналари ишчи сифатида америкаликларни ёллаши зарурлигини таъкидлади.
«Агар улар божлардан қочишни хоҳлашса, [заводларини] Қўшма Штатларда қуришади», — деди сиёсатчи.
Шунингдек, у Хитой янги келишув доирасида «Boeing» компаниясидан 750 та самолёт сотиб олиши мумкинлигини инкор этмади. Бундан олдин Америка етакчиси Хитойнинг 200 та «Boeing» самолёти сотиб олиш нияти ҳақида гапирган эди.
«Мен «Boeing» ва «General Electric» компанияларига айтдим: агар улар ишни яхши уддалашса, биз самолётлар сонини 750 тагача етказишимиз мумкин», — деди Трамп.
Тайвань атрофидаги вазият бўйича позиция
Сиёсатчи Тайвань атрофидаги вазият ҳақида гапираётиб, Пекин ва Тайбэй учун ўзаро муносабатларни нормаллаштириш оқилона қарор бўлишини кўрсатди. Шу билан бирга, у деэскалация (вазиятни юмшатиш) учун айнан қандай қадамлар ташланиши кераклигига аниқлик киритмади.
«Тайванга ҳам бир оз «совушиб» (тинчланиб) олиш жуда оқилона иш бўларди. Хитойга ҳам бир оз тинчланиш жуда оқилона бўларди», — деди Трамп.
Трампнинг қайд этишича, у ХХР раиси Си Цзиньпин билан музокаралардан сўнг Тайванга 14 миллиард долларлик қурол етказиб бериш ҳақидаги келишувни ҳали тасдиқламаган.
«Мен буни ҳали маъқуллаганим йўқ. Кўрамиз, нима бўлади. Буни қилишим ҳам мумкин, қилмаслигим ҳам мумкин», — деди у.
Трамп агар Тайвань мустақиллик эълон қилса, ХХРга қарши урушга киришни хоҳламаслигини таъкидлади. У томонлар ўртасидаги келишмовчиликлар фонида вазият янада ёмонлашмаслигига умид билдирди.
«Шундай дейман: мен кимдир мустақиллик йўлидан кетишини хоҳламайман. Чунки, ўзингиз биласиз, уруш олиб бориш учун биз 9,5 минг миль (15,2 минг километрдан ортиқ) масофани босиб ўтишимиз керак бўлади. Мен буни хоҳламайман. Уларнинг тинчланишини истайман. Хитойнинг тинчланишини хоҳлайман», — дея баёнот берди Трамп.
Яқин Шарқдаги можаро
Трамп музокаралар давомида Си Цзиньпин Эрон муаммоси бўйича ёрдам таклиф қилганини, бироқ у буни рад этганини айтди.
«Мен, шунингдек, бизга ёрдам керак эмаслигини айтдим. Бу ҳақда сўраганим ҳам йўқ», — дея аниқлик киритди Оқ уй раҳбари.
Трампнинг сўзларига кўра, у Қўшма Штатлар Эронни таслим бўлишга (капитуляцияга) мажбур қила олишига шубҳа қилмайди. У бундай натижага айнан қандай эришишини очиқламади.
«Ҳа, бунга шубҳам йўқ», — деб жавоб берди АҚШ президенти тегишли саволга.
Венесуэла нефтидан фойдаланиш
Америка етакчисининг таъкидлашича, АҚШ Венесуэла нефти орқали «катта бойлик» ишлаб олган.
«Биз уларнинг нефти билан бутун бошли бойлик орттирдик», — деди у.
Трамп 15 май куни (Москва вақти билан 16 майда) АҚШга қайтиб келди. У Эндрюс бирлашган базасида «Биринчи рақамли борт» (самолёт)дан тушди. Оқ уй матбуот хизмати ҳам Х (собиқ Twitter) ижтимоий тармоғида сиёсатчининг самолёт трапидан тушаётгани акс этган видеороликни эълон қилди.
