Қандай замонларга келиб қолдик?
Оғзидан она сутининг ҳиди кетмаган, ҳали суяги қотмаган «пацан»лар бугун кўчада қонун чиқармоқда!
Бухоро вилоятида содир бўлган сўнгги воқеа бутун жамиятни ларзага келтириши керак. Жамиятнинг энг оғриқли нуқтасига айланиб улгурган «кўча маданияти» энди мактаб партасидан чиққан 17 ёшли ўсмирлар ўртасида илдиз отмоқда. Жиноий гуруҳ тузиб, ўзини «кўчанинг хўжайини» деб эълон қилган бу тирранчалар нафақат ўз тенгдошларини, балки ўзларидан анча катта ёшдаги эркакларни ҳам «разбор»ларга чақириб, уларни аёвсиз калтаклаб келишган.
Хўш, бу пайтда мактаб қаерга қараяпти? Тонгдан кечгача маҳалладошларининг томорқасини текшириб юрадиган маҳалла фаоллари қаёққа қараяпти?
Бу воқеа шунчаки бир гуруҳ безориларнинг қўлга олиниши эмас, бу — тизимли инқироз сигнали! Агар бугун ўсмирлар қонунни писанд қилмай, катталарни «синдириш» даражасига етган бўлса, демак, биз келажакни бой беряпмиз. Тарбия занжири энг муҳим бўғинлардан — оила, мактаб ва маҳалладан узилиб кетган.
Бу кетишда яқин орада бошланғич синф ўқувчилари ўртасида ҳам жиноий тўдалар тузилиб, мактаб йўлакларида «кўча қоидалари» ўрнатилса ажабланмаса ҳам бўлади. Агар бугун фарзандларимизнинг қўлидан телефонни олиб, юрагидаги «кўча романтикаси»ни йўқотмас эканмиз, эртага жуда кеч бўлади!
Ҳурматли ота-оналар ва масъуллар, кўзимизни очадиган вақт келмадими?!
