Ўзбекистон терма жамоаси Канадага мағлубиятга учрагандан сўнг Фабио Каннаваро ўз фикрларини билдириб ўтди: Осиё футболи билан халқаро футбол ўртасидаги фарқни яхши биламан
Бугун, 2 июнь куни Канаданинг Эдмонтон шаҳрида Ўзбекистон терма жамоаси Канадага 0:2 ҳисобида мағлубиятга учради. Ўйиндан сўнг Ўзбекистон терма жамоаси бош мураббийи Фабио Каннаваро учрашув ҳақида ўз фикрларини билдириб ўтди.
“Ҳар қандай учрашувларда албатта хатолар бўлади. Хатоларни 10 кундан кейинги ўйинларда эмас, айнан мана шундай ўртоқлик ўйинларида қилган яхшироқ. Футбол шундай. Биринчи бўлимда жамоамиз ихчам ва агрессив ўйнади. Иккинчи бўлимда эса тўп назоратини кўпроқ қўлга олишни хоҳладик. Аммо интенсивликни йўқотдик ва бир нечта хатоларга йўл қўйдик”, дейди Каннаваро.
Шунингдек Каннаваро футболчилардан айнан биринчи бўлимдагидек жадалликни кутганини ва терма жамоага келганимдан бери юқори тезликда ўйнаш устида ишлаганини таъкидлади.
“Осиё футболи билан халқаро футбол ўртасидаги фарқни яхши биламан. Бу осон эмас, аммо биринчи бўлимда жамоамда кўплаб ижобий жиҳатларни кўрдим. Мен Канада терма жамоасини анчадан бери кузатиб бораман. У ерда кўплаб дўстларим бор. Сўнгги уч-тўрт йил ичида жамоа сезиларли даражада ўсди. Футбол Канадада жуда оммалашди”, дейди Ўзбекистон терма жамоаси устози.
Фабио Каннаваро ўйинда жароҳат олган футболчилар жумладан Азиз Ғаниевнинг ҳолати ҳақида ҳам маълумот берди.
“Юқори тезликда ўйнаганда жароҳатлар бўлиб туради. Ҳозирча жиддий нарса йўқ. Эртага ва индинга кўрамиз. Менимча, бугун ҳамма учун энг катта муаммо совуқ об-ҳаво бўлди. Шунга қарамай, кўплаб мухлислар стадионга келишди. Бундай қўллаб-қувватлаш остида ўйнаш биз учун жуда ёқимли бўлди. Бундай стадионда ўйнаш имкониятига эга бўлсангиз, бундан завқланишингиз ва буни қадрлашингиз керак. Бизни қўллаб-қувватлаш учун келган мухлисларга раҳмат айтишимиз керак. Бугун бу совуқ ҳавода стадионга келиш осон бўлмади”.
Шунингдек, Каннаваро гуруҳ босқичидаги рақиблар Португалия, Колумбия ва Конгони жуда кучли жамоалар деб атади. Улар билан ўйнаш жуда қийин бўлишини айтиб ўтди.
