Синган гитарадан бошланган йўл: Равшан Собиров ҳаёти ҳақида очиқчасига сўзлади
“Болалар” гуруҳининг собиқ хонандаси Равшан Собиров “Изларим” дастурида меҳмон бўлиб, санъатга кириб келиш тарихи, ёшликдаги меҳнат фаолияти ва ҳаётидаги оғир синовлар ҳақида очиқчасига гапирди.
Хонанданинг айтишича, у тўрт фарзандли оилада вояга етган. Аммо акаси эрта вафот этгани сабабли ҳозир оилада у, синглиси ва укаси қолган. Равшан Собиров оиласидан санъат соҳасини танлаган ягона фарзанд эканини таъкидлади. Унинг сўзларига кўра, ота-онаси фабрикада меҳнат қилгани учун болалик йилларида кўп вақт боғчада қолишга тўғри келган.
Хонанда ёшлик йилларида тирикчилик ташвишлари сабаб турли ишлар билан шуғулланганини ҳам эслади. У Тошкентдаги “Чорсу” бозорида лимон ва бошқа мевалар сотган, кейинчалик “Иподром” бозорида ҳам ишлаган. Собировнинг таъкидлашича, у савдода фаол бўлиб, турли бизнес йўналишларида ўзини синаб кўрган.
Равшан Собировнинг санъатга бўлган қизиқиши эса дўстининг эски ва синган гитарасидан бошланган. У 14 ёшида симлари йўқолган гитарани таъмирлаб, турли жойлардан топилган симлар ёрдамида қайта ишга туширган. Шундан кейин мусиқа чалишни мустақил ўрганиб, дўстлари билан қўшиқлар ижро эта бошлаган.
Хонанданинг биринчи мустақил ижоди ҳам айнан шу даврга тўғри келади. Унинг сўзларига кўра, илк басталаган қўшиғи “Жавоб бер” бўлган. Кейинчалик қўшиқ матни укаси Ҳусан билан ҳамкорликда ёзилган.
Собиров ҳаётидаги энг оғир синовлардан бири қизининг туғма юрак нуқсони билан дунёга келгани бўлганини айтди. Ўша пайтда қизининг даволаниши билан банд бўлгани сабабли давлат тадбирига тайёргарлик жараёнларида қатнашолмаган. Кейинчалик эса унинг тадбирга келмагани ҳақида нотўғри маълумот тарқатилгани айтилган.
Хонанданинг таъкидлашича, мазкур ҳолатдан кейин у масъулларга ўз эътирозини билдирган. Шундан сўнг лицензияси бекор қилинган ва маълум муддат ижодий фаолиятига чеклов қўйилган.
Равшан Собировнинг ҳаёт йўли меҳнат, сабр ва турли қийинчиликларни енгиб ўтиш билан боғлиқ бўлиб, у бугун ҳам ўз ижоди орқали мухлислари меҳрини қозониб келмоқда.
