Онаси у 18 ёшида бўлганида вафот этган!..
Ким «ПСЖ»га қандай муносабатда бўлишидан қатъи назар, Энрике бошқараётган бу жамоа нафақат чиройли ва кучли футбол ўйнамоқда, балки унинг таркибида таъсирли ва қайғули тақдирларга эга инсонлар ҳам бор.
Вильян Пачонинг онаси у 18 ёшида бўлганида вафот этган. Шунинг учун у ҳозир 51-рақамли либосда тўп суради — бу онасининг вафот этган пайтдаги ёшини англатади.
Жоау Невеш эса 19 ёшида онасидан айрилган. Шундан кейин у Парижга кўчиб ўтган. Бутунлай ёлғиз ҳолда, ҳеч кимни танимасдан ва француз тилини билмасдан янги ҳаёт бошлаган.
«ПСЖ» мураббийлар штаби аъзоларидан бири Рафаэль Польнинг турмуш ўртоғи 2024 йил охирида узоқ давом этган касалликдан сўнг вафот этган. Энрике унга таътил берган ва Поль бир йил давомида хотинига ғамхўрлик қилган. Унинг вафотидан кейин ишга қайтган ва айнан шу давр жамоанинг қайта туғилиши билан мос келган.
Луис Энрикенинг тўққиз ёшли қизи эса 2019 йилда ҳаётдан кўз юмган. У 2025 йилги Чемпионлар лигаси финалига чиққанидан кейин шундай деган эди:
«Ксана финалда жисмонан биз билан бирга эмасди, аммо руҳан ўша ерда эди. Қаерда бўлмасин, ҳозир у ҳам биз билан бирга бу ғалабани нишонлаётганига ишонаман».
Бу энди кўзларида фақат пул порлаб турадиган, бутсалари ялтироқ тошлар билан безатилган ўша дабдабали «ПСЖ» эмас. Бу — ҳаётнинг оғир синовларини бошдан кечирган инсонлардан ташкил топган жипс ва аҳил жамоа.
