Тейлор Свифт тарихдаги энг бой аёл хонандага айланди
Forbes журнали томонидан эълон қилинган навбатдаги Iconoclast 50 рейтингига кўра, жаҳон саҳнасининг машҳур юлдузи Тейлор Свифт расман мусиқа оламидаги энг бой аёл хонанда сифатида эътироф этилди. Нашр маълумотларига кўра, 2026 йил март ҳолатида унинг умумий бойлиги 2 миллиард долларга етган.
Рейтингда Тейлор Свифт Бейонсе, Бэд Банни ва Зе Уикнд каби машҳур ижрочиларни ортда қолдирди. Бироқ мусиқа саноати тарихидаги энг бой ижрочи мақоми ҳозирча ҳам америкалик рэпер Жей-Зига тегишли бўлиб қолмоқда. Унинг бойлиги 2,8 миллиард доллар деб баҳоланган.
Тейлор Свифт 2024 йилда ўзининг машҳур «Эрас Тур» гастрол сафари туфайли миллиардерлар қаторига қўшилган эди. 16 ой давом этган мазкур концерт тури жаҳон мусиқа тарихида энг кўп даромад келтирган гастроль лойиҳаси сифатида қайд этилди. Тур доирасидаги чиқишлар хонандага миллиардлаб долларлик тушум келтирди.
Хонанданинг бойлиги фақат концертлар ҳисобига эмас, балки унинг мусиқий каталоги орқали ҳам ошиб борди. У аввалги альбомларини қайта ёзиб чиқиб, қўшиқлари устидан тўлиқ ҳуқуқни қайтариб олди. Бу қарор муаллифлик ҳақларидан тушадиган даромадларнинг катта қисмини ўз назоратига олиш имконини берди.
2025 йил май ойида Тейлор Свифт ўзининг илк қўшиқларига тегишли мастер-ёзувларни ҳам қайта сотиб олди. Forbes ҳисоб-китобларига кўра, бу келишув қиймати 360 миллион долларга баҳоланган. Шу тариқа хонанда бир неча йил давом этган ҳуқуқий низога якун ясади.
Айни пайтда Тейлор Свифтнинг янги ва аввалги хит қўшиқлари ҳам катта даромад келтиришда давом этмоқда. Унинг «Зўравон Шоирлар Департаменти» ва «Шоу Қизнинг Ҳаёти» альбомлари тижорий жиҳатдан юқори натижаларни қайд этмоқда.
Шу билан бирга, хонанда хайрия ишларида ҳам фаол иштирок этиб келмоқда. У табиий офатлардан жабр кўрганлар ҳамда оғир аҳволга тушиб қолган оилаларга ёрдам бериш учун мунтазам равишда миллионлаб доллар маблағ ажратиб туради.
