Машҳур Муҳаммад: «Бегонанинг онасини онам деб қўшиқ айтмайман»
«Сиқилма» қўшиғи билан мухлислар меҳрини қозонган хонанда Машҳур Муҳаммад «Ширин сухан» подкастида меҳмон бўлиб, санъатга кириб келиши, ҳаётдаги қарашлари ва ижодий фаолияти ҳақида очиқчасига сўзлади.
Хонанданинг айтишича, унинг санъат йўлини танлашига болалигидаги унутилмас воқеа сабаб бўлган. 1991 йил 1 сентябрь куни бўлиб ўтган байрам тадбирида саҳнага чиқиб қўшиқ ва латифа айтган кичик Машҳур томошабинларнинг олқишига сазовор бўлган. Айниқса, вилоят ҳокимининг ўрнидан туриб қарсак чалгани унинг хотирасида чуқур из қолдирган.
«Ўша куни саҳнада турган пайтимда чалинаётган қарсаклар айнан мен учун эканини ҳис қилганман. Балки санъатдан бошқа касбни танламаганимга ҳам айнан шу воқеа сабаб бўлгандир», — дейди хонанда.
Машҳур Муҳаммад бугунги кунда ҳам ҳаёти тўлиқ санъат билан боғлиқ эканини таъкидлади. Унинг сўзларига кўра, рўзғорини ҳам, оиласини ҳам айнан ижод орқали таъминлаб келмоқда.
Суҳбат давомида хонанда туғилган кунлар ва чақалоқни кутиб олиш маросимларида хизмат қилишга муносабатини ҳам билдирди. Унинг таъкидлашича, карантин йилларида иқтисодий қийинчиликларга дуч келган бўлса-да, бундай тадбирларда қатнашишни ўзига муносиб деб ҳисобламаган.
«Пул топиш учун кимнингдир онасини онам, дадасини дадам деб қўшиқ айтишни тасаввур ҳам қилолмайман. Ҳар кимнинг ўз танлови бор, лекин мен ғурур ва ор-номус билан яшаш тарафдориман. Оч қолсам ҳам бундай ишни қилмасликка ҳаракат қиламан», — деди у.
Хонанда шунингдек, «Сиқилма» қўшиғи чиққандан кейин кўплаб мухлислардан таъсирли мактублар олганини айтди. Айримлар қўшиқ ҳаётнинг оғир дамларида уларга куч берганини билдирган бўлса, бошқалар бу тарона ўз ҳаёти ҳақида чуқурроқ ўйлашга ундаганини таъкидлаган.
Машҳур Муҳаммаднинг сўзларига кўра, у ҳатто шифохоналарга бориб, беморлар учун ҳам мазкур қўшиқни ижро қилиб берган. Беморларнинг самимий миннатдорчилиги ва дуолари эса хонанда учун энг катта рағбат бўлган.
Хонанда санъат инсонларга нафақат кайфият, балки умид ва руҳий куч ҳам бағишлаши кераклигини таъкидлади. Унинг фикрича, ҳақиқий ижодкор аввало одамлар қалбига йўл топиши лозим.
