ЕИ Украинадаги урушда Россия томонидан қатнашган собиқ иштирокчиларнинг киришини тақиқлайди
Еврокомиссия раҳбари Урсула фон дер Ляйен сешанба, 9 июн куни Россия урушига қарши санкцияларнинг 21-пакетини тақдим этди, дея хабар беради DW’нинг Брюсселдаги мухбири Ксения Полская.
Хусусан, Европа Иттифоқи Россиянинг Украинага бостириб киришида қатнашган барча шахсларнинг ҳудудга киришини тақиқлайди. «Европа Украинага бостириб киришда иштирок этганларнинг барчаси учун ёпиқлигича қолмоқда», — деди Ляйен.
Шунингдек, Россия «соя флоти»нинг яна 30 та кемасини санкциялар рўйхатига қўшиш режалаштирилган — бунгача чекловлар остига тушган 632 та кемага қўшимча сифатида. Европа Иттифоқи илк бор «соя флоти»га ёрдам берадиган, масалан, ёқилғи қуйиш хизматларини кўрсатадиган кемаларга қарши ҳам чоралар кўриш ниятида. Россия нефти савдоси ва уни қайта ишлаш билан боғлиқ инфратузилма объектлари ҳам чекловлар остига тушиши мумкин.
Молия соҳасида Брюссел операцияларни тақиқлашни яна 30 та Россия банкига, шунингдек, санкцияларни айланиб ўтишга ёрдам бераётган учинчи давлатлардаги 20 та банк, криптокомпания ва нефт трейдерларига нисбатан кенгайтиришни таклиф қиляпти.
Бундан ташқари, пакет Москва ҳарбий-саноат мажмуаси томонидан қўлланиладиган товарлар ва технологиялар, жумладан, дронлар учун бутловчи қисмлар экспортига янги чекловларни назарда тутади. Шунингдек, Россиядан қиймати қарийб 60 миллион евролик бир қатор товарлар импортига янги тақиқлар таклиф қилинмоқда.
Санкциялар илк бор балиқчилик секторига ҳам дахл қилиши мумкин: Еврокомиссия бир қатор балиқ маҳсулотлари импортини чеклашни ва уларнинг айримлари импортини бутунлай тақиқлашни кўриб чиқяпти.
Эндиликда ушбу пакет ЕИга аъзо давлатлар томонидан бир овоздан маъқулланиши керак.
