Шаҳзод Султонов бўлажак турмуш ўртоғини қандай танлагани ва нега ўзидан 12 ёш кичик қизга уйланаётгани ҳақида сўзлаб берди

Актёр Шаҳзод Султонов YouTube’даги “Чотки TV” каналига берган интервьюсида шахсий ҳаёти, тарбияси ва бўлажак турмуш ўртоғи ҳақида фикр билдирди.

Унинг айтишича, бугунги кунда эришган ютуқларида ота-онасининг ўрни катта бўлган. Актёр 16 ёшидан меҳнат қилиб келаётганини, ёшлик даврида керакли нарсаларни ўз кучи билан топишга ўргатилганини таъкидлади. Унинг сўзларига кўра, отаси қаттиққўл, онаси эса меҳрибонроқ бўлган ва айнан шу тарбия услуби унинг шаклланишида муҳим аҳамият касб этган.

Суҳбат давомида у оила қадриятлари ҳақида ҳам тўхталиб, фарзанд тарбиясида ота ва онанинг ўрни тенг даражада муҳим эканини қайд этди. Шу боис, имкони бўлса, оилалар ажрашмасдан муроса йўлини топиши кераклигини таъкидлади.

Шаҳзод Султонов ўзининг ҳаёт тарзи ҳақида ҳам гапириб, ҳеч қандай зарарли одатларга эга эмаслигини айтди. Унинг фикрича, яхши овқат, чой, салқин ичимликлар ва спорт билан шуғулланиш инсон учун етарли бўлиши мумкин. Актёр атрофидаги инсонларни кузатиб, турли одатлар инсон ҳаётига салбий таъсир кўрсатиши ҳақида хулоса чиқарганини билдирди.

Турмуш ўртоқ танлаш масаласига келганда эса, у қизларнинг ижтимоий тармоқдаги фаолиятига эътибор қаратишини айтди. Актёрнинг таъкидлашича, инсоннинг Instagram саҳифаси орқали унинг қарашлари ва ҳаёт тарзини маълум даражада билиш мумкин. Шу сабабли у авваллари тавсия қилинган айрим қизларнинг ижтимоий тармоқлардаги фаолиятини кўриб, муносабатларни давом эттирмаган ҳолатлари ҳам бўлганини маълум қилди.

У бўлажак рафиқаси билан танишуви ҳақида ҳам сўзлаб берди. Актёрнинг айтишича, қиз ижтимоий тармоқларга катта аҳамият бермайди ва айнан шу жиҳат унинг эътиборини тортган. Шунингдек, иккиси ўртасидаги қарашлар ва қизиқишлар ҳам ўхшаш чиққан.

Шаҳзод Султонов ҳозир 30 ёшда эканини, бўлажак турмуш ўртоғи эса 18 ёшда бўлиб, тиббиёт соҳасида 2-босқич талабаси эканини маълум қилди. Уларнинг ўртасида 12 ёш фарқ бўлса-да, бир-бирини тушуниши ва ҳаётга бўлган қарашлари мос келганини таъкидлади.

Актёрнинг сўзларига кўра, икки томон ҳам ота-оналар розилигига катта аҳамият берган. У бахтли оила қуриш учун аввало ота-онани рози қилиш кераклигига ишонишини айтди. Шу тариқа жуфтлик ўзаро келишув ва оилалар розилиги асосида тўйга тайёргарлик кўрмоқда.