Париж яқинида ўтказилган тинтувларда Пикассонинг ўғирланган картинаси топилди
Полиция полотнони наркотикларнинг ноқонуний айланишига оид иш бўйича ўтказилган тинтувлар вақтида 17 кг гашиш ва 200 минг евролик бренд буюмлар билан бирга мусодара қилди.
Полиция амалиёти Франция пойтахти яқинидаги Шампини-сюр-Марн коммунаси ва Ормессон-сюр-Марн шаҳарчасида бўлиб ўтди.
Ҳақиқийлиги тасдиқланган картинада Пикассонинг маҳбубаси Мари-Терез Валтер тасвирланган. Полотнонинг қиймати 12-15 млн еврога баҳоланмоқда, деб хабар бермоқда Le Parisien.
Полотно гиёҳванд моддалар савдоси иши бўйича асосий айбланувчи бўлган 37 ёшли эркакнинг холасининг уйида бўлган.
У айбини тан олди, бироқ буни ўзи ишлайдиган санъат асарларини сақлаш компаниясининг хавфсизлик тизимидаги заифликларни кўрсатиб қўймоқчи бўлганлиги билан изоҳлади. Ўғрилик ва ўғирланган нарсаларни яшириш моддалари бўйича жиноят иши қўзғатилган. Асосий айбланувчи билан бирга яна беш киши қўлга олинган, улардан уч нафари қамоққа олинган.
