Жанубий Кореянинг собиқ президенти яна 2 йилга қамалди
Жанубий Кореянинг собиқ президенти Юн Сок Ёл сайловолди кампаниясини молиялаштириш тўғрисидаги қонунни бузганлик бўйича ишда икки йилга озодликдан маҳрум этилди.
Yonhap агентлиги хабар беришича, Сеул марказий туман суди 2022 йилги президентлик сайловлари олдидан Юн Сок Ёл ва унинг рафиқаси номидан тахминан 190 минг долларлик бепул ижтимоий сўровлар ўтказилганини аниқлаган. Терговга кўра, сўров агентлиги раҳбари Мён Тэ Гюн бунинг эвазига муайян манфаат кутган.
Мазкур иш бўйича Мён Тэ Гюн ҳам бир ярим йилга озодликдан маҳрум қилинди.
Шу билан бирга, Юн Сок Ёлнинг рафиқаси Ким Гон Ҳи алоҳида иш доирасида сайловолди кампаниясини молиялаштириш қонунини бузиш айблови бўйича биринчи ва иккинчи инстанция судлари томонидан оқланган. Собиқ президентнинг адвокатлари ушбу қарор устидан апелляция беришларини маълум қилди.
Эслатиб ўтамиз, жорий йил февраль ойида Юн Сок Ёл конституциявий тузумга қарши қўзғолон уюштириш айблови билан умрбод қамоқ жазосига ҳукм қилинган эди.
