Испания футбол бўйича жаҳон чемпиони бўлди

Испания терма жамоаси 2026 йилги Жаҳон чемпионати финалида Аргентинани 1:0 ҳисобида мағлуб этиб, жаҳон чемпиони унвонини қўлга киритди. Шу тариқа испанлар ўз тарихида иккинчи марта мундиал ғолибига айланди. Испания 2010 йилда ЖЧ финалида Нидерландияни 1:0 ҳисобида мағлуб этиб, чемпионликни қўлга киритган эди.

Нью-Жерси штатидаги “МетЛайф” стадионида бўлиб ўтган ҳал қилувчи учрашув юқори суръат ва муросасиз курашларга бой бўлди. Ҳар икки жамоа ғалаба учун охиригача курашди, бироқ асосий вақтда ҳисоб очилмади. Ягона голни Ферран Торрес 106-дақиқада киритди.

Аргентиналиклар антирекорд қайд этиб ютқазди, Скалони шогирдлари ўйин давомида бирор марта аниқ зарба бера олмади, бунақаси ЖЧ финалларида кузатилмаганди.

Бу Аргентина учун Жаҳон чемпионатлари тарихидаги еттинчи финал бўлди. Жамоа шу кунгача уч марта чемпион (1978, 1986, 2022) бўлган бўлса, тўрт марта (1930, 1990, 2014, 2026) финалда мағлубиятга учраган.