Макрон Трампга қарши чиқмоқда
АҚШнинг Европага қарши тариф жорий этиши америкалик фуқаролар учун инфляциянинг ошишига олиб келади. Бу ҳақда Франция президенти Эммануэл Макрон якшанба куни CNN телеканалига берган интервьюсида айтиб, АҚШ президенти Доналд Трампнинг молиявий таҳдидларига қарши туришга ваъда берди.
«Сизнинг асосий муаммойингиз Европа Иттифоқими? Йўқ, мен бундай деб ўйламайман. Сизнинг асосий муаммойингиз Хитой, шунинг учун эътиборингизни айнан шунга қаратишингиз керак», — деди Франция етакчиси инглиз тилида.
Трампнинг тариф сиёсатига қарши курашишга тайёрмисиз, деган саволга Макрон: «Мен буни илгари ҳам қилганман ва яна қиламан», деб жавоб берди. Шу билан бирга, у Европа Иттифоқи, энг аввало, «ўзи учун ҳаракат қилиши» лозимлигини таъкидлади.
Савдо келишмовчиликлари фонида Макрон 109 миллиард евролик сунъий интеллектни ривожлантириш дастурини эълон қилди.
«Биз бу пойгада қатнашишимиз шарт. Биз унинг бир қисми бўлишни, инновациялар яратишни истаймиз. Акс ҳолда, биз бошқаларга қарам бўлиб қоламиз», — деди Франция президенти.
Лойиҳанинг катта қисми хорижий инвесторлар томонидан молиялаштирилади. БАА Францияда маълумот маркази қуриш учун 30 миллиард евро сармоя киритади, Канаданинг Броокфиелд инвестиция компанияси эса 20 миллиард евро инвестиция ажратишга ваъда берди.
Макрон ушбу француз дастурини ўтган ой Трамп томонидан эълон қилинган 500 миллиард евролик «Старгате» лойиҳасига жавоб сифатида тақдим этди. Франция президентининг сўзларига кўра, аҳолига нисбатан инвестициялар ҳажми бўйича ҳар иккала лойиҳа ҳам деярли бир хил даражада катта аҳамиятга эга.
