Украина зарба берилмаслиги керак бўлган объектлар рўйхатини таклиф этмоқда

Украина Россия ҳужумларини тўхтатиши лозим бўлган энергетика, инфратузилма ва фуқаролик объектлари рўйхатини тузиб, ҳамкорларга топширмоқчи. Агар Москва бу шартни бажарса, Киев ҳам Россия энергетика инфратузилмасига зарба беришни тўхтатади.

Бу ҳақда Президент Владимир Зеленский Финляндия Президенти Александр Стубб билан учрашувдан сўнг Хелсинкида ўтказилган матбуот анжуманида маълум қилди.

Унинг айтишича, Путиннинг зарбаларни тўхтатиш ҳақидаги сўзлари етарли эмас, чунки унинг сўнгги баёнотларидан кейин ҳам Россия ҳужумларни давом эттирган. «Фақат Путиннинг ваъдалари кифоя қилмайди. Нега? Чунки бу уруш бизни жуда амалиётчи одамларга айлантирди,» – дея таъкидлади Зеленский.

У эслатиб ўтганидек, Россия раҳбарининг Украина инфратузилмасига ҳужумларни тўхтатиш ҳақидаги сўзларидан сўнг, Россия қўшинлари дронлар билан 145 та зарба берган, 4 та С-300 ва 2 та «Искандер» баллистик ракетасини учирган. Натижада темир йўл иншоотлари, қишлоқ хўжалиги корхоналари ва 21 та турар жой биносига зарар етган.

Зеленский бу масалада қатъий назорат бўлиши лозимлигини ва айнан АҚШнинг уни таъминлашда ҳал қилувчи роль ўйнаши зарурлигини таъкидлади. У Украина объектлар рўйхатини тайёрлаётганини ва уни ҳамкорларга топширишини тасдиқлади. Шунингдек, агар Россия томонидан шартлар бажарилса, Киев ҳам Россия Федерациясининг энергетика объектларига зарба беришни тўхтатишини маълум қилди.