Опасига SMS-хабарларда жинсий яқинлик қилишни таклиф қилган йигитни пичоқлаган ука қамалди
Хоразм вилоятида опасига ишқий мазмундаги уятсиз SMS-хабарлар ёзган танишидан ўч олиш мақсадида уни ўлдирмоқчи бўлган эркак 7 йил муддатга озодликдан маҳрум этилди. Ҳужжатда келтирилишича, 28 ёшли йигитга 2025 йилнинг июнь ойи охирида Россия Федерациясида меҳнат мигранти сифатида ишлаб юрган вақтида опаси маҳалладоши унга ишқий мазмунда SMS-хабарлар ёзиб, жинсий яқинлик қилишни таклиф қилганини айтган. Судланувчи бу хабарлардан ғазабланиб Ўзбекистонга қайтиб келган ва жабрланувчидан ўч олишни режалаштирган.
2025 йил 23 июль куни тунги соат 01:45 атрофида у олдиндан сотиб олган ошхона пичоғини ўзи билан олиб, жабрланувчини йўлда учратиб қолган. Уни уйигача элитиб қўйиш баҳонасида автомашинасига миндириб олган. Йўлда машина ёқилғиси тугаб қолганидан фойдаланган ҳолда, судланувчи жабрланувчининг бўйин соҳасига пичоқ билан зарба берган. Иккинчи зарбани беришга уринган пайтда эса жабрланувчи қўли билан ҳимояланиб, қочиб қолган.
Жабрланувчига ўз вақтида тиббий ёрдам кўрсатилгани сабабли унинг ҳаёти сақлаб қолинган. Суд-тиббий экспертизасига кўра, олинган жароҳатлар инсон ҳаёти учун ўта хавфли бўлган ва агар пичоқ бир оз чуқурроқ санчилганида, ўлимга олиб келиши мумкин бўлган.
2025 йилнинг 18 декабрь куни Жиноят ишлари бўйича Янгиариқ туман судида мазкур иш кўриб чиқилган. У Жиноят кодексининг 97-моддаси (қасддан одам ўлдириш) 1-қисмида назарда тутилган жиноятни содир этганликда айбли деб топилган ва 7 йил озодликдан маҳрум қилиш жазоси тайинланган.
Суд жараёнида судланувчи ва унинг ҳимоячиси қилмишни енгилроқ моддага қайта квалификация қилишни сўраб апелляция шикояти киритган. Бироқ, жорий йилнинг 28 январь куни Хоразм вилоят суди жиноят ишлари бўйича судлов ҳайъатининг апелляция инстанцияси мазкур ишни кўриб чиққан. Апелляция инстанцияси суди жиноятнинг барча ҳолатлари, далиллар, гувоҳлар кўрсатмалари ва экспертиза хулосаларини ўрганиб чиқиб, судланувчининг ҳаракатлари қасддан одам ўлдиришга суиқасд сифатида тўғри баҳоланган, деган хулосага келган. Натижада суд биринчи инстанция ҳукмини ўзгаришсиз қолдириб, судланувчини 7 йил муддатга озодликдан маҳрум этиш тўғрисидаги қарорни кучида қолдирган.
