Женисбек Пиёязов аллақачон тўйлари «гули» бўлишга улгурган!.. Так что, тўйга чақиришмайди деганлар адашишади!..
Ўзбекистон, Қорақалпоғистон, Бошқирдистон ва Татаристон халқ артисти Женисбек Пиязов санъатга кириб келиши, соҳадаги қийинчиликлар ва ҳаётидаги муҳим воқеалар ҳақида сўзлаб берди.
“Санъаткорлар оиласиданман”
Санъаткорнинг айтишича, у ижодкорлар сулоласида туғилган. Унинг бобоси — Қорақалпоғистон халқ артисти, Ўзбекистонда хизмат кўрсатган артист Зийнел Пиязов актёр бўлган. Оиладаги ана шу муҳит кейинги авлодга ҳам таъсир кўрсатган.
“Опера нима эканини билмасдим”
Женисбек Пиязов ёшлиги қийинчиликларга тўғри келганини эслайди. Илк фаолиятини тўйларда клавиш чалишдан бошлаган. Кейин эстрада, реп ва рок йўналишларида ҳам ўзини синаб кўрган.
Овози ўзгаргандан сўнг оддий қўшиқларни ижро этиш қийинлашган. Шунда устози унинг овози опера учун мос эканини айтган. Қизиғи, ўша пайтда у “опера нима?” деган саволни ҳам берган.
Тўйлар ва халқаро тадбирлар
Бугунги кунда хонанда тўй хизматларига ҳам тез-тез чақирилади. Айниқса, хорижлик меҳмонлар иштирок этадиган тадбирларда у турли тилларда қўшиқ ижро этиши билан ажралиб туради.
Унинг таъкидлашича, классик мусиқа ҳеч қачон қадрини йўқотмайди. Шу сабабли у нафақат тўйлар, балки хориждаги чиқишлар орқали ҳам яхши даромад топмоқда.
Операдаги қийинчиликлар
Хонанда операни танлаган пайтда соҳада катта даромад бўлмаганини айтади. Ойлик маош бор-йўғи 250 минг сўм бўлган. Шу сабаб кўплаб иқтидорли ёшлар соҳани тарк этган.
Бироқ Пиязов турли халқаро танловларда қатнашиб, катта ютуқларга эришган. Айрим мусобақаларда 5–25 минг долларгача мукофотлар олган.
Озодбек Назарбеков ёрдами
Хонанданинг илк яккахон концертини ташкил этишда Озодбек Назарбеков катта ёрдам берган. У ташкилотчиларни ишонтириб, концерт ўтказилишига кўмаклашган.
2017 йилда бўлиб ўтган биринчи концерт катта муваффақият қозонган. Унда дипломатлар ва хорижий меҳмонлар ҳам иштирок этган.
“Ҳар доим ‘ҳа’ дейиш фойда берди”
Женисбек Пиязовнинг таъкидлашича, у фаолияти давомида кўпчиликка бепул хизмат кўрсатган. Бу эса кейинчалик унинг концертларини ташкил этишда асқотган.
“100 минг сўмлик костюмим энг қадрлиси”
Хонанда ҳаётидаги энг унутилмас воқеалардан бири — “Шуҳрат” медали билан тақдирланган кун. Ўша пайтда у янги костюм сотиб олиш имконига эга бўлмаган.
Унга “Чорсу” бозоридан 100 минг сўмлик костюм олиб берилган. Бугунги кунда қимматбаҳо костюмлари бўлса-да, айнан ўша арзон костюм унинг учун энг қадрлиси бўлиб қолган.
