Фабио Каннаваро: «Бу ўйин биз учун катта тажриба бўлди»
Ўзбекистон миллий терма жамоаси бош мураббийи Фабио Каннаваро Колумбияга қарши кечган жаҳон чемпионатидаги дебют учрашувидан сўнг ўз фикрлари билан ўртоқлашди ва жамоасининг ўйинига баҳо берди.
«Учрашув жуда қизиқарли ўтди. Айниқса, иккинчи бўлимда биз ўйинни ўзгартиришга эриша олдик. Чап қанотни фаоллаштирган ҳолда қатор хавфли вазиятлар яратдик ва ўйин назоратини ўз қўлимизга олишга ҳаракат қилдик.
Авваламбор, биз Ўзбекистонни бутун дунёга ижобий томондан намойиш этиш учун бу ерга келдик. Мен доим шогирдларимга ўйин давомида фаол ҳаракат қилиш кераклигини уқтириб келаман. Тўғри, Колумбия сингари юқори даражадаги жамоаларга қарши тўпсиз ҳаракат қилиш асло осон эмас. Умуман олганда, иккинчи таймда яхши ҳаракат қилдик, бироқ афсуски, якунда гол ўтказиб юбордик.
Нима бўлганда ҳам, биз ушбу стадионда ўтган учрашувни бир умр эслаб қоламиз. Чунки бу мамлакатимиз учун тарихий ўйиндир. Биз Жаҳон чемпионатидамиз ва бугунги баҳс биз учун яхши тажриба бўлди, деб айта оламан. Ўйинда хатолар ҳам кўзга ташланди, энди улар устида жиддий ишлаймиз», – деди Каннаваро.
