Моуриньо «Реал» раҳбариятидан яна бир футболчи сотиб олишни сўради
Мадриднинг «Реал» клуби бош мураббийи Жозе Моуриньо жамоа таркибини кучайтириш бўйича режалар тузишда давом этмоқда.
Diario AS нашрининг хабар беришича, португалиялик мутахассис клуб раҳбариятидан яна бир ўйинчи — услуби жиҳатидан Хоселуга ўхшаш бўлган соф марказий ҳужумчи сотиб олишни сўраган. Шунга қарамай, ҳозирча бу «қаймоқранглилар» учун трансфер бозоридаги энг асосий мақсад эмас. Клубдагилар Гонсало Гарсия ҳам ушбу вазифани яхши уддалай олиши мумкин деб ҳисоблашмоқда. Якуний қарор мавсум олди тайёргарлик машғулотлари бошланганидан кейин, янги устоз барча футболчилар билан шахсан ишлаб кўрганидан сўнг қабул қилинади.
Эслатиб ўтамиз, якунланган мавсумда «Реал Мадрид» Ла Лигада иккинчи ўринни эгаллади ва бирорта ҳам кубок мусобақасида ғолиб чиқа олмади.
