Италияда юз берган зилзилада 21 киши жароҳатланди
Миллий геофизика ва вулқоншунослик институти маълумотларига кўра, Италия жанубидаги Неапол шаҳри яқинида 4,7 магнитудали ер силкиниши содир бўлган. Зилзила бутун шаҳар ва унинг атрофида, айниқса, эпицентр жойлашган Флегрей майдонлари ҳудудида, Неаполдан 6 км узоқликда, аниқ сезилган.
Бу мазкур ҳудудида сўнгги 40 йил ичида қайд этилган энг кучли силкинишдир. Мазкур зилзиладан бир неча соат ўтиб 3,8 магнитудали силкиниш юз берган.
Табиат ҳодисаси оқибатида биноларга шикаст етган. Айрим юқори кучланишли электр устунлари қисман қулаб тушган, бунинг натижасида Фуоригрота ва Баноли туманлари электрсиз қолган. Бундан ташқари, поездлар ҳаракати вақтинча тўхтатилган.
Солфатара вулқони ҳудудида тоғ тизмасининг бир қисми ўпирилиб тушган. Поццуоли порти унга олиб борувчи йўлларда ёриқлар пайдо бўлгани сабабли ёпилган. Ҳокимият органлари жабрланганларга ёрдам кўрсатиш пунктларини ташкил этган, аҳолига ичимлик суви ва энг зарур буюмлар тарқатилган.
