Зеленский Путин билан исталган вақтда учрашишга тайёрлигини билдирди
Украина президенти Владимир Зеленский Россия президенти Владимир Путин билан учрашишга тайёр эканини айтди. Унинг таъкидлашича, икки давлат раҳбарлари ўртасида келишмовчиликлар ва душманлик мавжуд бўлса-да, асосий мақсад урушни тугатиш бўлиши керак.
«Бир-биримиздан нафратланишда давом этайлик, сиз ҳам нафратланинг, душманлармиз — ҳаммаси аниқ. Лекин урушни тугатайлик. Ўтиринг ва гаплашайлик», — деди Зеленский.
У, шунингдек, Россия билан «энергетика сулҳи»га тайёрлигини билдирди. Зеленскийга кўра, агар Москва Украина энергетика объектларига ҳужумларни тўхтатса, Киев ҳам Россия энергетика инфратузилмасига зарбаларни тўхтатишга тайёр.
Зеленский Путин уч томонлама учрашув ўтказишга ва урушни тугатиш бўйича музокараларга ҳозирча тайёр эмас, деб ҳисоблашини айтди. Унинг фикрича, АҚШ президенти Дональд Трамп Россия, Украина ва АҚШ раҳбарлари иштирокидаги учрашувни ташкил қилиши мумкин.
Шунингдек, Зеленский Трампдан Украинага «Patriot» ҳаво мудофаа тизимлари ракеталарини етказиб бериш ҳақидаги илтимосига ҳали аниқ жавоб олмаганини маълум қилди.
