Жанубий Кореянинг Россияга бензин етказиб бергани қонун доирасида(ми)?
Жанубий Корея Россияга бензин етказиб берган
Жанубий Корея портларидан Россияга йўл олган танкерларга июль ва август ойларида 176 минг тоннадан ортиқ ёқилғи юкланган. Бу ҳақда The Guardian порт ҳужжатлари ва кемалар ҳаракати маълумотларига таяниб хабар берди.
Маълумотларга кўра, 7 та танкер Россиянинг Узоқ Шарқига 14 марта қатнов амалга оширган. Уларнинг учтаси Европа Иттифоқи ва Буюк Британия санкциялари остида бўлган.
Айрим ҳужжатларда кемаларнинг якуний манзили сифатида Япония ёки Сингапур кўрсатилган, аммо кейинчалик улар Владивосток томон ҳаракатланган.
CREA таҳлилига кўра, август ойида Россия денгиз орқали қарийб 368 минг тонна нефт маҳсулотлари импорт қилган. Бу июль ойига нисбатан 7 баробар кўп. Жанубий Корея қарийб 112 минг тонна етказиб бериш билан Ҳиндистондан кейин иккинчи ўринни эгаллаган.
Таҳлилчилар бундай етказиб беришлар Россияга қарши санкцияларнинг самарадорлигига таъсир қилиши мумкинлигини таъкидлаган. Бироқ ушбу операциялар Жанубий Корея қонунларини бузмаган, чунки Сеулнинг Россияга қарши амалдаги чекловлари асосан саноат маҳсулотлари, электроника ва бошқа товарлар экспортига қаратилган.
