АҚШда ишлашни истаган ўзбекистонликлар учун янги имконият очилмоқда
Ўзбекистон Миграция агентлиги раҳбари Муҳсинхўжа Абдураҳмонов АҚШнинг Head Honchos компанияси вакиллари билан онлайн учрашув ўтказди.
Музокараларда ўзбекистонликларни АҚШ қишлоқ хўжалиги соҳасида мавсумий ишларга тайёрлаш ва ишга жойлаштириш масалалари муҳокама қилинди.
Номзодлар учун тахминан 12 ҳафталик ўқув дастури ишлаб чиқилади.
Унда:
инглиз тили;
қишлоқ хўжалиги техникасини бошқариш;
ускуналарга техник хизмат кўрсатиш ва таъмирлаш;
пайвандлаш;
меҳнат хавфсизлиги бўйича амалий кўникмалар ўргатилади.
АҚШлик иш берувчилар дастурни ишлаб чиқиш, номзодларни синовдан ўтказиш ва якуний сертификатлаш жараёнларида иштирок этади.
Таъкидланишича, биринчи гуруҳни АҚШдаги баҳорги қишлоқ хўжалиги мавсумига тайёрлаш бўйича ишлар олиб бориляпти.
Иш берувчиларнинг аниқ буюртмалари олиниб, танлов мезонлари тасдиқланганидан сўнг номзодларни саралаш ва ўқитиш бошланади. Қабул шартлари ҳамда ариза топшириш тартиби Миграция агентлигининг расмий каналларида эълон қилиниши айтилган.
Ариза қабул қилиш бошлангани ҳақида маълумот эса, ҳозирча берилмаган.
