Моцартнинг илгари номаълум бўлган қўлёзмаси топилди
Францияда Вольфганг Амадей Моцартнинг илгари номаълум бўлган қўлёзмаси – композиторнинг 1778 йилда Париждаги фаолияти давомида тузилган 44 саҳифалик нота дафтари топилди. Мутахассислар ушбу топилмашни сўнгги ўн йилликлардаги энг муҳим кашфиётлардан бири деб атамоқда. Бу ҳақда “Deutsche Welle” хабар берди.
Қайд этилишича, қўлёзма узоқ вақт давомида Франция Миллий кутубхонасининг мусиқа бўлимида XVIII аср охирига мансуб муаллифи номаълум ҳужжат сифатида сақланиб келган. Мусиқа коллекциялари сақловчиси Франсуа-Пьер Гуа 2026 йилнинг февраль ойида қайдларнинг бир қисми Моцартнинг дасхатига ўхшаш қўлда ёзилганини пайқаб қолган. Кейинчалик унинг бу тахмини экспертиза томонидан тасдиқланган.
Дафтарда композиция бўйича машқлар ҳамда флейта ва арфа учун еттита пьеса ўрин олган. Тадқиқотчиларнинг фикрига кўра, бу 22 ёшли Моцартнинг 1778 йилнинг майидан июлига қадар ўз шогирди герцог де Гиннинг қизи Мари-Луиза-Филиппина де Гинга ҳар куни берган сабоқлари материалларидир.
Мутахассисларнинг баҳолашича, ушбу дафтар Моцартнинг композициядан қандай дарс берганлигига оид маълум бўлган энг эрта даврга тегишли далилдир. Моцартнинг дарсларида яратилган флейта ва арфа учун олтита пьеса тўлиқ сақланиб қолган ва улар замонавий концерт репертуарини бойитиши мумкин. Кўплаб парчаларнинг муаллифлиги жамоавий бўлиб қолмоқда: дафтарда ҳам устознинг, ҳам унинг шогирдининг ёзувлари ўзаро уйғунлашиб кетган.
Сўнгги машқ якунига етмай қолган, дафтарнинг охирги олти саҳифаси эса бўш. Тадқиқотчиларнинг тахмин қилишича, дарслар Мари-Луиза де Гиннинг 1778 йил 26 июлдаги тўйидан кейин тўхтатилган.
Гўзал асарлар илк бор эртага, 21 июнь куни Франция Миллий кутубхонасининг Овал залида кенг омма учун ижро этилади. Пьесалар Француз радиоси Филармония оркестри солистлари – флейтачи Матильда Кальдерини ва арфачи Николя Тюлье томонидан ижро этилади. Кейинги куни эса ушбу асарларнинг француз радиоси эфирида жаҳон радиопремьераси бўлиб ўтиши режалаштирилган.
