Зеленский: «Трамп билан учрашув кўп нарсани ўзгартириши мумкин»
Украина президенти Владимир Зеленский АҚШ президенти Дональд Трамп билан телефон орқали мулоқот қилди. Томонлар Нью-Йоркда учрашишга келишиб олди. Бу ҳақда Зеленский ижтимоий тармоқларда маълум қилди.
«Ҳозиргина президент Трамп билан гаплашдик. Муҳим суҳбат бўлди ва кўп масалаларни муҳокама қилишга улгурдик. Нью-Йоркда учрашишга келишиб олдик ва бу учрашув кўп нарсани ўзгартириши мумкин. Дипломатик жараёнда ҳаракат бор», — деди Украина раҳбари.
Зеленский, шунингдек, Стив Уиткофф ва Жаред Кушнернинг Киевга ташрифи учун миннатдорлик билдирганини айтди.
«Биз муҳим тафсилотларни батафсил муҳокама қилдик ва улар Украинадаги вазиятни ўз кўзлари билан кўрди», — деди у.
Украина президентининг таъкидлашича, деэскалация чоралари ва хавфсизликнинг асосий йўналишлари, жумладан, энергетика, озиқ-овқат хавфсизлиги ҳамда инсонлар ҳаётини ҳимоя қилиш бўйича ғоялар мавжуд.
«Биз Америка жамоаси билан биргаликда ишлаяпмиз ва ҳақиқатан ҳам жиддий қадамлар ташлашга тайёрмиз», — дея қўшимча қилди Зеленский.
