Шунақанги совуқ делегация ҳам бўладими?!

Милан–Кортина 2026 Қишки Олимпия ўйинларининг очилиш маросимида Исроил ва АҚШ терма жамоаларига нисбатан анчагина ҳақорат кузатилди!

Милан шаҳридаги «Сан-Сиро» стадионида бўлиб ўтган тантанали очилиш маросими айрим миллий делегациялар чиқиши пайтида томошабинларнинг турлича реакцияси билан ёдда қолди. Бу ҳақда Италиянинг Adnkronos ахборот агентлиги хабар берди.

Маълумотларга кўра, Исроил терма жамоаси спортчилари майдонга чиққан пайтда трибуналардан свист (у сўкишларни ёпиб кетган бўлса не ажаб) эшитилган. Шунингдек, АҚШ делегацияси ҳам қисман шундай муносабатга дуч келган. Бироқ Украина терма жамоаси чиқиши стадиондаги 61 минг нафар томошабиннинг кучли олқишлари билан қарши олинди. Украина делегацияси 46 нафар спортчидан иборат экани қайд этилди.

Айниқса, стадионнинг катта экранларида АҚШ вице-президенти Жей Ди Вэнс намойиш этилганида баланд свист ва ҳайқириқлар янграган. Бу ҳолат Америка делегацияси майдон бўйлаб юриб ўтаётган пайтга тўғри келган. Шу билан бирга, спортчиларнинг ўзи эса олқишлар билан қарши олингани таъкидланди.

Исроил терма жамоаси майдонга икки байроқдор — фигурали учиш бўйича спортчи Мария Сенюк ва атлет Жаред Файрстоун бошчилигида чиққан.