Яна Трампга «пошёл» дейишди!.. Бечора Трамп кундан-кунга хўрланяпти!..
АҚШнинг европалик иттифоқчилари Ҳурмуз бўғозидаги ҳарбий-денгиз операциясида иштирок этишга тайёр эмаслар ва Трамп ўрнатган блокададан ўзларини узоқ тутмоқдалар, деб хабар беради Bloomberg.
Вашингтон шерикларидан Эрон қирғоқлари яқинида кемалар қатнови хавфсизлигини таъминлашда ёрдам беришни талаб қилмоқда, бироқ қўшма миссия тузиш борасида ҳеч қандай илгарилаш йўқ: на Буюк Британия, на Франция барқарор сулҳ ўрнатилмагунча у ерга ҳарбий кемаларини юборишга рози бўлмаяпти.
Трамп якшанба куни Исломободда Эрон билан музокаралар муваффақиятсиз якунланганидан сўнг Ҳурмуз бўғозини денгиз орқали блокада қилишини эълон қилди ва ушбу блокадага «бошқа давлатлар» ҳам қўшилишига ваъда берди. Аммо ҳозирча ҳеч ким қўшилгани йўқ.
Буюк Британия Бош вазири Кир Стармер BBC телеканалига берган интервьюсида очиқчасига: «Биз блокадани қўллаб-қувватламаймиз», деб баёнот берди. Унинг сўзларига кўра, Британия Эрон билан урушга «тортилмайди». Макрон ҳам шу куни фақат ўт очиш тўхтатилганидан кейингина «тинчликпарвар кўп миллатли миссия» бўйича конференция ташкил этишни таклиф қилди.
CENTCOM маълумотларига кўра, душанба куни олтита савдо кемаси Америка ҳарбийларининг буйруғи билан ортга қайтган ва Эрон портларига қайтган. Бирорта ҳам кема блокадани ёриб ўта олмаган. Фақатгина санкция остидаги Хитойнинг «Rich Starry» танкери бўғоз орқали Уммон қўлтиғига ўтишга муваффақ бўлган.
Иттифоқчилар билан боғлиқ бу машмаша март ойи ўрталаридан бери давом этмоқда, ўшанда Трамп илк бор шерикларидан бўғозни очишда ёрдам беришни талаб қилган эди. Европа Ташқи ишлар вазирликлари буни рад этишди, Япония ва Австралия ҳам сўровга рад жавобини берди. Бундан ғазабланган Трамп НАТОни «қоғоз йўлбарс», европаликларни эса «қўрқоқлар» деб атади.
Ўтган ҳафта Трамп НАТО бош котиби Марк Рютте билан учрашувда иттифоқчилардан бир неча кун ичида ёрдам бериш режаларини тақдим этишни талаб қилди. Рютте маслаҳатлашувлар учун вақт кераклигини айтди. Дарвоқе, унинг ватани Нидерландия аниқ таклиф — мина қидирувчи кемаларни (тральшикларни) таклиф қилган ягона давлат бўлди.
Шунингдек, Bloomberg-нинг бугунги хабарига кўра, Эрон 16 апрель куни бошланиши мумкин бўлган янги музокаралар раундини барбод қилмаслик учун ўз кемалари қатновини вақтинча тўхтатиб туришга тайёр.
