Кекса аёлларнинг суяк емирувчи кундалик одатлари маълум бўлди
Австралиялик олимлар мунтазам чой ичиш кекса аёлларда суякларнинг мустаҳкамланиши билан боғлиқ бўлиши мумкинлигини аниқлаши. Қаҳвани ҳаддан ташқари кўп истеъмол қилиш эса, аксинча, суяк тўқимасининг ёмонлашишига олиб келар экан. Тадқиқот Nutrients журналида эълон қилинди.
Тадқиқотчилар остеопороз бўйича йирик тадқиқотда қатнашган 65 ёшдан ошган 9,7 мингга яқин аёлнинг маълумотларини таҳлил қилди. Тахминан ўн йил давомида иштирокчилар чой ва қаҳва истеъмол қилиш одатлари ҳақида маълумот бериб борган, олимлар эса уларнинг суяк тўқимаси зичлигини баҳолаган.
Остеопороз 50 ёшдан ошган аёллар орасида энг кенг тарқалган касалликлардан биридир. Менопаузадан сўнг эстроген даражаси пасаяди, бунинг оқибатида суяклар мўртлашиб, синиш хавфи ортади.
Тадқиқот муаллифлари мунтазам чой ичиб юрадиган аёлларнинг сон соҳасидаги суяк минерал зичлиги чой ичмайдиганларга қараганда бир оз юқорироқ эканини аниқлади. Айниқса, яққол самара семизликдан азият чекадиган аёлларда кузатилган.
Олимларнинг фикрича, бунинг эҳтимолий сабаби чой таркибидаги катехинлардир. Бу моддалар суяк тўқимасининг шаклланишига масъул ҳужайралар фаолиятини қўллаб-қувватлаши мумкин.
Кунига беш чашкадан ортиқ қаҳва ичган иштирокчиларда эса суяк тўқимаси зичлиги пасайиши ҳолатлари кўпроқ учраган. Бу кофеиннинг кальций сўрилишини ёмонлаштириши мумкинлигини кўрсатувчи аввалги тадқиқотлар натижаларига мос келади.
Бундан ташқари, мунтазам спиртли ичимлик истеъмол қилган аёлларда қаҳва ичиш суяк зичлигининг пасайиши билан боғлиқлиги аниқланган. Муаллифларнинг тахминича, кофеин ва алкоголь суяк тўқималарига салбий таъсирни кучайтириши мумкин.
Шу билан бирга, олимлар бу натижалар қаҳвадан бутунлай воз кечиш кераклигини англатмаслигини таъкидламоқда.
“Тадқиқотимиз натижалари қаҳва ичишни ташлаш ёки литрлаб чой ичишни бошлаш керак, дегани эмас. Бироқ чойни меъёрида истеъмол қилиш суяк саломатлигини сақлашнинг оддий усули бўлиши мумкин. Қаҳвани ҳаддан ташқари кўп, айниқса, спиртли ичимликлар билан бирга истеъмол қилиш эса салбий оқибатларга олиб келиши эҳтимоли бор”, дея изоҳ берди Лью.
