Хитойлик блогер мушуклари учун мини-баскетбол аренаси барпо этди

Хитойлик блогер ва муҳандис Син Чжилей ўзининг мушуклари учун ҳақиқий баскетбол аренасини қуриб, ижтимоий тармоқларда катта қизиқиш уйғотди.

Маълум қилинишича, блогер ушбу ноодатий лойиҳа устида уч ой давомида меҳнат қилган. Арена ичида томошабинлар учун трибуналар, паркет қопламали ўйин майдони, баскетбол саватлари, электрон экранлар ҳамда мушукларга мос кичик ўлчамдаги тўплар жойлаштирилган.

Чжилей тайёр бўлган аренани ўз саҳифаларида намойиш этган. Эълон қилинган видеолар ва суратларда у мушуклари билан мини-баскетбол ўйнаётганини кўриш мумкин.

Бу муҳандиснинг мушуклари учун амалга оширган ягона лойиҳаси эмас. У бир неча йилдан бери “Мушуклар шаҳри” деб номланган йирик лойиҳа устида ишлаб келмоқда. Ушбу миниатюра шаҳар таркибида метро тизими, уй, банк, кинотеатр, супермаркет ва ҳатто “MeowDonald’s” номли кафе ҳам мавжуд.

Бундан ташқари, блогер ижтимоий фаолияти билан ҳам танилган. У кўча мушуклари учун иссиқ ва хавфсиз бошпаналар қуриб бериш орқали ҳайвонларга ғамхўрлик қилиб келмоқда.