Нидерландия ва Ўзбекистон 2 та ўйин ўтказиши мумкин: Куннинг марказий ўйинини қачон ва қаерда кўриш мумкин?
Бугун, 8 июнь куни Ўзбекистон миллий терма жамоалари ўртаси Нидерландия билан Жаҳон чемпионати олдидан сўнгги ўртоқлик ўйинида майдонга чиқади.
Роналд Куман бошчилигидаги “Учар голландлар” учун бу баҳс мундиалдаги илк рақиб — Японияга қарши ўйин олдидан сўнгги синов вазифасини ўтайди. Нидерландия терма жамоаси Ню-Ёркдаги “Иcаҳн Stadium” ўйингоҳида бўлиб ўтадиган ушбу баҳс орқали Жазоирга қарши кечган (0:1) кутилмаган мағлубиятдан сўнг ўз мавқеини тиклаб олишни кўзламоқда.
Тасдиқланмаган хабарларга кўра, Роналд Куман қайдномадаги барча футболчиларга ўйин вақти бериш учун Ўзбекистонга қарши 2 та ўйин ўтказишни сўраган ва жамоалар бугун 2 та ўйин ўтказиши мумкин. Куман ушбу ўйинда асосий таркибни синаб кўришини, қолган ўйинчилар эса кейинроқ ўтказиладиган 35 дақиқалик иккита бўлимдан иборат норасмий учрашувда майдонга тушишини таъкидлагани инобатга олинса, дастлабки ўйин 45 дақиқадан, иккинчи ўйин эса 35 дақиқадан ўтказилиши мумкин. Ҳозирги вақтга қадар на ЎФА, на Нидерландия томони бу ҳақда ҳеч қандай маълумот берганича йўқ.
Ўзбекистон миллий терма жамоаси учун эса бу баҳс тарихий аҳамиятга эга бўлиб, Нидерландия Ўзбекистон ўз тарихида тўқнаш келадиган Европанинг 17-жамоаси бўлади ва бу рақиб ҳозиргача дуч келинган энг кучли рақиблардан бири ҳисобланади.
Терма жамоа бунгача қуйидаги Европа жамоалари билан тўқнаш келган:
Грузия – 2
Латвия – 1
Озарбайжон – 10
Словакия – 1
Эстония – 1
Швеция – 1
Туркия – 1
Украина – 2
Россия – 1
Қозоғистон – 7
Босния ва Герсоговина – 1
Албания – 1
Арманистон – 1
Исроил – 1
Черногория – 1
Беларус – 3
Фабио Каннаваро шогирдлари Жаҳон чемпионатидаги дебютлари олдидан Канададан қабул қилинган 0:2 ҳисобидаги мағлубиятдан тўғри хулоса чиқарган ҳолда майдонга тушади деган умид бор.
Мазкур ўйин Тошкент вақти билан соат 23:45 да бошланади. Ушбу баҳсни ўзбекистонлик мухлислар “Зўр ТВ” ва “Футбол TV” телеканаллари орқали жонли эфирда томоша қилишлари мумкин.
Ўзбекистон майдонда тўлиқ кўк либосда, дарвозабон эса яшил либосда ҳаракат қилади. Мундиалдаги дастлабки рақиблар — Колумбия, Португалия ва Конго ДР билан бўлажак ўйинлар олдидан Нидерландияга қарши кечадиган бу баҳс жамоанинг тактик ва жисмоний ҳолатини баҳолаш учун энг мақбул имконият ҳисобланади.
