Колумбияда президентлик сайловида «Эль Тигро» ғалаба қозонди
Колумбияда бўлиб ўтган президентлик сайловларининг иккинчи босқичида ўнг қанот номзоди Абелардо де ла Эсприэлья ғалаба қозонди. Бюллетенларнинг 99,9 фоизи санаб чиқилганидан сўнг, у 49,66 фоиз овоз тўплади.
Ўзини АҚШ президенти Дональд Трамп тарафдори сифатида танитган ва «Эль Тигро» («Йўлбарс») лақаби билан машҳур сиёсатчининг асосий рақиби — амалдаги президент тарафдори ва чап қанот коалицияси номзоди Иван Сепеда 48,7 фоиз овоз олди. Қолган бюллетенлар ҳақиқий эмас ёки бузилган деб топилди.
31 май куни ўтказилган биринчи турда ҳам ҳеч бир номзод 50 фоиздан ортиқ овоз тўплай олмаган эди. Ўшанда Абелардо де ла Эсприэлья 43,7 фоиз, Иван Сепеда эса 40,9 фоиз овоз билан етакчилар қаторида бўлган.
Колумбиянинг амалдаги президенти Густаво Петро қайта сайланиш учун номзодини қўймади. Шунингдек, унга нисбатан сайловолди жараёнларида сиёсий фаоллик билан боғлиқ икки интизомий текширув бошлангани хабар қилинмоқда.
Шу тариқа, Колумбияда ҳокимият чап қанотдан ўнг қанотга ўтмоқда ва мамлакат сиёсий йўналишида янги босқич бошланиши кутилмоқда.
