“Қизил шарбат” сериали юлдузи Эже Иртем 35 ёшида вафот этди
Туркиянинг машҳур “Қизил шарбат” сериалида Ишил ролини ижро этган актриса Эже Иртем 15 июнь куни 35 ёшида вафот этди.
Туркия ОАВ маълумотларигакўра, актриса эрталаб ўзини ёмон ҳис қилган. Ўша пайтда унинг ёнида онаси бўлган. Тез ёрдам хизмати чақирилгач, шифокорлар воқеа жойига етиб келиб, реанимация чораларини кўришга киришган, бироқ Иртемнинг ҳаётини сақлаб қолишнинг имкони бўлмаган.
Актрисанинг ўлимини унинг адвокати Уғур Геккўюн тасдиқлади. Унинг сўзларига кўра, фожианинг дастлабки сабаби юрак хуружи экани тахмин қилинмоқда. Якуний хулоса эса суд-тиббий экспертизаси ўтказилгач, эълон қилинади.
Актрисанинг вафоти Туркияда кенг резонансга сабаб бўлди. Вафотидан бир кун аввал Эже Иртем 35 ёшини нишонлаганди. Байрамдан сўнг у ижтимоий тармоқларда ўзини туғилган куни билан табриклаганларга миннатдорлик билдириб пост қолдирган. Бу унинг саҳифасидаги сўнгги ёзувлардан бири бўлиб қолди.
Эже Иртем 1991 йил 14 июнь куни Сивас шаҳрида туғилган. Касбий таълимни Яшар университетида олиб, у ерда опера санъати ва вокал йўналишида таҳсил олган. Талабалик давридаёқ таниқли ўқитувчилар ва санъаткорлар билан ишлаган, шундан сўнг телевидениедаги фаолиятини бошлаган.
Актрисага энг катта шуҳратни сўнгги йилларнинг энг кўп муҳокама қилинган турк лойиҳаларидан бирига айланган “Қизил шарбат” сериалидаги роли олиб келди. Шунингдек, томошабинлар Иртемни “Оила” сериали ва бир қатор бошқа телепостановкалардаги иштироки орқали ҳам яхши билишади.
