Кержаковдан прогноз: Ўзбекистон учун гуруҳдан чиқиш осон бўлмайди
Россия миллий терма жамоасининг собиқ футболчиси Александр Кержаков АҚШ, Канада ва Мексика мезбонлик қилаётган 2026 йилги жаҳон чемпионати ҳақида фикр-мулоҳаза билдирди.
Машҳур ҳужумчи мундиалда илк бора иштирок этадиган Ўзбекистон миллий терма жамоасининг имкониятларига ҳам баҳо берди.
– Бошланаётган жаҳон чемпионати мен учун жуда қизиқ. Менда чемпионлик учун ягона фаворит йўқ, аммо соврин учун курашадиган бир гуруҳ кучли терма жамоалар бор: Англия, Испания, Франция ва Португалия.
Жаҳон чемпионатининг энг яхши тўпурари бўлиш учун номзодлар орасида алоҳида Килиан Мбаппени таъкидламоқчиман. Менимча, унинг бунга имконияти жуда яхши.
Сюрприз қилиши мумкин бўлган кучли бўлмаган терма жамоалар орасида турнир мезбонлари – Мексика, АҚШ ва Канада футболчиларини ажратиб кўрсатган бўлардим. Улар ўз майдонида ўйнайди, шунинг учун яхши натижа кўрсатиш учун барча имкониятларга эга. Балки улардан кимдир ҳақиқатдан ҳам турнирнинг энг юқори босқичларигача етиб бориши мумкин.
Шунингдек, кўплаб россиялик томошабинлар каби мен ҳам Ўзбекистон миллий терма жамоасига мухлислик қиламан. Айниқса, яқинда Элдор Шомуродов ва Аббосбек Файзуллаев билан шахсан танишиш имкониятига эга бўлдим.
Муаммо шундаки, улар жуда оғир гуруҳга тушган. Бу квартетда Португалия, Колумбия ва Конго Демократик Республикаси миллий терма жамоалари билан кучли рақобат бўлади.
Негадир кўпчилик Конго Демократик Республикасини етарли даражада баҳоламаяпти, ҳолбуки бу Африка қитъасининг жуда кучли жамоаси. Шунинг учун Ўзбекистонга жуда қийин бўлади. Плей-оффга чиқишнинг ўзи ҳам ўзбеклар учун улкан муваффақият бўлади, – деди Кержаков.
Жаҳон чемпионати уч мамлакат — АҚШ, Мексика ва Канадада ўтказилади. Мундиал 11 июнь куни Мексика ва Жанубий Африка Республикаси терма жамоаси ўртасидаги учрашув билан старт олади.
Ўзбекистон терма жамоаси мундиални 18 июнь куни Колумбия терма жамоасига қарши ўйин билан бошлайди.
